迪卡儂大發現之【單車篇】

今日有幸走左轉 MK 迪卡儂，又睇下佢係正式開業後有無乜吸引玩物。上次人地開幕日，阿涉水步行兄回報話單車區未齊貨，所以今次首先一嘢衝入去睇下自己最好奇嘅單車區域先，以下就為大家介紹一下：

雖然家中宗能再增加一部單車，不過咁多成車放喺度都係吸睛嘅。同場有唔少平價成車，由$879 至 $3,159 都有，個樣都唔差代步一流。

愈來愈多香港單車友轉踩 Road Bike，Decathlon 呢度亦有唔少選擇。

接落嚟就係配件，真心講都好平吓，記得撳定錢先好嚟。

小弟最 amazing 就係見到呢個防爆內呔，賣 $39。

睇完個簡介基本上都唔明係咩一回事，咁唯有再 youtube 一下...

睇完忍不住講咗句師傅明白了，原來係指喺內呔入面加咗防爆液，如果係細嘅破口，就會自動噴出嚟塞住個破口，一般情況下可以迅速阻止漏氣，呢個技術之前只見過用喺 Tubeless，所以今次真係好驚喜，不過實際情況要等人試過先知有幾 work。

紅燈白燈，充電入電任你揀。

膠水樽架，唔怕刮花心愛水樽，同埋幾輕吓。

$99 碼錶唔係最平果種，不過幾靚仔。

除咗防爆呔其實仲有普通內呔。

公路車 Lock 踏及掛片

實際效能順暢程度未知，但以三百蚊左右呢個價位能夠入手，相信對於一眾入門級公路車友，特別係剛接觸 Lock 踏的師兄相信係一個好福音。

咁去得大大間迪卡儂當然又唔止睇單車，下次就寫埋行山露營嘢啦。

------------------------------

迪卡儂旺角店 - 旺角雅蘭中心地庫

文｜冠業

👍香港 Gear4Wild 專頁