呢條路線幾多星？其實係有客觀標準

A君：今個星期六我哋去行大城石澗好唔好呀？

B君：Err….. 大城石澗幾多星架….?

A君：某某網站話條澗1星咋喎

B君：……..

行得山多，你有無試過同人有過類似嘅討論？如果你都問過人哋呢啲問題、或者畀人問過呢啲問題，你有無發現其實呢啲問題都有問題？

例如：

(a)嗰啲代表“難度”嘅星星，係邊個訂出嚟嘅呢？同埋係畀邊個人睇？要過一條斑馬線對於一個成年人嚟講係完全無難度，一粒星都畀多佢；但對於一個三歲小朋友嚟講，要自己過馬路又唔畀車撞死，呢個已經係一個“5星級”嘅task… 行山徑嘅呢啲星星，係畀新手睇定係高手睇架呢？
(b) 石澗又有1-5星嘅路線，郊遊徑又有1-5星嘅路線；咁一條1星嘅石澗嘅難度，係咪等於一條1星山徑嘅難度？如果係，咁咪即係行嗰條石澗同行一條石屎路無分別？如果唔係，咁1星嘅石澗嘅難度等於幾多星嘅山徑？有無方程式可以做換算？
(c) 假設呢條行山徑有3星，咁即係我要帶幾多水、帶幾多嘢食？我要預行幾耐？一條3公里嘅行山徑佢又話係3星，一條30公里嘅行山徑佢又話係3星… 究竟呢啲“星星”係點訂出嚟架？

如果你都有思考過呢啲問題，你就會發現，其實最根本嗰個問題係：呢啲雜誌、網站所制定嘅“星星”難度指標，係根據咩嘢標準去畀分？唔好以為幫路線嘅難度畀分係兒戲嘅事，自己“feel like”條路線有幾難就比幾多分——咁兒戲嘅話，一嚟因為你嘅評分無根據任何客觀標準，人哋睇左其實都唔知條山徑係咩樣，有評分等於無評分；二嚟如果有人真係信晒你嘅評分，結果行咗一條你覺得好易，但原來對攀登者技巧有好高要求嘅路線，佢無準備好，就會出意外，到時就累死人。
認真地講，求其做，呢啲“星星”評分只係一啲喺網絡上譁眾取寵嘅伎倆，隨時害人不淺；但如果做得好，呢啲難度評分可以向登山者提供有用嘅資訊，等佢哋做好充足嘅準備，減少意外發生嘅機會。

你以為淨係得某某雜誌先識得幫山徑難度評分？其實為登山線路嘅難度評級呢個做法由來已久，由世界上第一本guide book出現開始，登山界已經不斷為唔同嘅攀登線路制定難度評級，因此發展出好多唔同嘅評級系統。呢啲系統表達嘅模式同時下好多網絡雜誌嘅所謂評分好似，都不過係幫一條線路打個分數姐；但好唔同嘅係，人哋呢啲評分系統係真係“有base”、有客觀標準，熟悉呢啲系統嘅人，係真係可以根據呢啲分數去推測某條路線嘅難度架！

全世界唔同國家嘅政府，都會為自己管轄範圍內嘅登山路線做難度評分（香港漁農自然護理署都唔例外）。“如何為登山徑難度評分”甚至係某啲大學教授嘅研究題目嚟添。所以其實登山路線評級大有學問，今日，就等我哋一齊睇下，釐定登山路線嘅難度，有幾多種方法！

喺2007年，時任Project Officier嘅Alvaro Arias，幫澳洲政府嘅Department of Sustainability and Environment做咗一個好詳盡嘅概覽，羅列咗澳洲、紐西蘭、美國、英國、加拿大、南非同愛爾蘭呢幾個國家嘅政府，喺自己國家公園入面實施嘅山徑難度評級系統。嗰篇報告嘅題目叫《Overview of Existing Walking Trail Classification Systems》——如果你淨係識得睇完某網頁嘅評分，然後就同人哋講嚟緊星期六要行嗰條山路有幾多星，但當人哋問你3星即係有幾難你又答唔出嘅話，咁就真係應該上網搵呢份報告嚟睇下，開下眼界。舉個例子，澳洲政府將行山徑難度分做6級，頭3個級別嘅意思如下（係呀，人哋啲級別係真係有意思架）：

一級路線：
簡介：給予大量遊客行走的機會，當中包括行動不便人士。設施充足；遊客有大量機會學習自然知識（包括告示牌及傳單）。在路上會經常遇上其他遊客。
路況：堅硬而開闊的路面(闊度1.2米或以上)，適合輪椅使用者。保養良好，極少破壞。
斜度：平坦至微斜，有樓梯的地方會有斜板可供行走。
路標：用作指路或公園管理的指示牌會大量出現；交叉路口會有箭嘴指示。
建築物：有觀景台、椅子、欄杆等設施；山徑旁一般不准露營。
山勢：登山人士無須任何經驗。
天氣：不適用

二級路線：
簡介：給予大量遊客行走的機會。設施充足；遊客有中等至頗多學習自然知識的機會。在路上不時會遇上其他遊客。
路況：一般都是人工的硬地；闊度最少有0.9米。保養良好，極少破壞。
斜度：斜度一般不超過1:10，只有極少量樓梯。
路標：用作指路或公園管理的指示牌會經常出現；交叉路口通常有箭嘴指示。
建築物： 可能有觀景台、椅子、欄杆等設施；山徑旁一般不准露營。
山勢：登山人士無須任何經驗。
天氣：不適用

三級路線：
簡介：輕微人工化的自然環境，需要一般程度的體能。人工設施、路標等不常見。遊客可以有機會親身感受自然環境（只有少量告示牌和小冊子）。偶然會遇上其他旅客。
路況：一般是稍微經過改造的山徑；部分是硬地。山徑闊度不一，少於1.2米。偶然有少量障礙物。
斜度：某些路段斜度可能超過1:10，但一般來說在1:10以下。有時候可能會出現大量樓梯。
路標：只有少量告示牌；某些地方可能會有指示方向的路牌。
建築物： 除了關乎人身安全或環境保護的情況外，一般不會有人工設施；；山徑旁一般不准露營。
山勢：旅客不需有穿越密林的經驗，但要有基本程度的登山技能。常見的自然災害包括斜坡、不穩定的路面、少量位置需要渡河。
天氣：有風雨的話，登山者定向的能力和安全可能受到影響。

如果想知道澳洲第四至六級路線嘅定義，可以隨時download返份報告落嚟睇睇。你以為澳洲政府將難度評級列到咁詳細，已經係去到好盡？仲未算，喺1999年，南非University of Pretoria嘅 Leon M. Hugo教授，甚至寫咗一份研究報告，講述點樣可以用一條方程式，淨係睇住一張地形圖，就可以計算出行一條山路會消耗一名登山者幾多能量，仲建議用能量值嚟做山徑難度嘅評分添！總括而言，不論係喺大學做研究定係政府管理國家公園，佢哋一般會用以下準則去釐定一條攀登路線嘅難度：
1. 路線嘅長度
2. 路線需時
3. 山徑嘅闊度
4. 路面平唔平坦
5. 斜度
6. 路線有無客觀風險或自然災害
7. 路牌指示嘅多寡
8. 洗手間嘅多寡
9. 遮蔽物（例如涼亭）嘅多寡

想知道一套你用開嘅“星星”系統係咪一套好嘅系統，其中一個方法就係揀一條路線，睇下佢有幾多星，然後試下可唔可以根據星星數量去推測出以上九項指標嘅狀況。舉個例子，如果有個網站同你講，一條“大東山>鳳凰山”嘅路線難度有4星，你可唔可以即刻推斷出條路線有幾長、有幾斜、有幾多路牌、條路平唔平坦….？當然好難有一套完美嘅評級系統，可以畀你一睇就完全知道晒成條路線係咩樣；但如果有一個評級系統，係你攞住佢畀你嘅分數，你仍然對於你要行嘅路線幾乎一無所知，咁嗰套系統，又有乜用呢？

下面畀多個喺香港會有機會用到嘅評分標準畀大家參考下，係漁農署自己為主要行山徑制定難度評級嘅評分系統。希望大家以後可以安全上山，安全落山——

漁農自然護理署“郊野樂行”難度評分
難度值：1-4星
計算方法：

	1星	2星	3星	4星
長度	< 5公里	5-<11公里	11-<16公里	>=16公里
時間	< 3小時	3-<5小時	5-<7小時	>=7小時
坡度	上落<=100m	101-250m	251-500m	>=500m
路面狀況	平坦易行	有少量梯級	路窄多級	頗多梯級

綜合難度= (長度+時間+坡度+路面狀況)/4

參考資料：

Arias, A. (2007). Overview of Existing Walking Trail Classification Systems: Walking Trails Classification and Improvement Project. Department of Sustainability and Environment, Victoria, U.S.

AFCD (2014d). Trail List: Grading Reference. Retrieved on 27 Aug 2017, from http://hiking.gov.hk/eng/trail_list/Grading_Reference.htm.

Hugo, M. L. (1999). Energy equivalent as a measure of the difficulty rating of hiking trails. Tourism Geographies, 1, 358-373.

注意：本文章純屬作者個人見解，並不反映香港野外訓練中心或其他相關機構的立場或意見。

圖｜文：Peter