Exped 手按充氣地蓆 撳下撳下就泵漲

乳膠﹑雞蛋殼﹑自動充氣﹑吹氣，唔同種類嘅地蓆真係乜都試均哂，其實都係各有長短，之不過今次測試嘅 Exped AIRMAT LITE PLUS 5 手按充氣地蓆喺各項評價都相當唔錯，係一件值得買嘅裝備嚟。

重量 ⭐️⭐️⭐️

帶去camp乜都唔講都一定要睇重量，Exped 重 560克，論輕身的確係有更好嘅選擇，不過相較 Exped 其他地蓆，Exped AIRMAT LITE PLUS 5 就用咗更厚更耐用嘅布料，可以話係一個合理重量。

體積 ⭐️⭐️⭐️⭐️

要放入背囊，當然更要睇下佔用嘅空間。Exped 摺起為 22 x 9.5cm，同小弟嘅另一張自動充氣地蓆相比仲細咗唔少，大大提升放入袋嘅靈活性。

厚度 ⭐️⭐️⭐️⭐️⭐️

要有效隔絕背部同地面，以免體温喺地下散失，地蓆嘅厚度可以話係愈厚愈好，呢方面 Exped 絕唔會令大家失望，打漲之後差不多 5cm 嘅厚度令人十分滿意。

物料 ⭐️⭐️⭐️⭐️⭐️

要模擬屋企張床，就連地蓆嘅面料都唔可以忽略。同皮膚接觸嘅部分如果啜肉就唔慌舒服得去邊啦，Exped 用 75D布料作為面料，舒服唔痴身，瞓上去有瞓喺床單嘅感覺。

充氣情況 ⭐️⭐️⭐️

同其他類型相比，充氣地蓆有充氣呢個過程，使用前要花少少時間準備，所以充氣時間係十分重要。

手按充氣系統係由澎漲海綿構成，所以建議打氣之前先張地蓆取出攤平，等海綿澎漲增加入氣量加快充氣時間。

親試為 Exped AIRMAT LITE PLUS 5 充氣，如果只靠手按大概要不停按壓5分鐘，相比其他打氣方法需時稍長，不過喺唔靠外部氣泵，唔用口吹，只以內部結構充氣嚟講都係一個合理時間 (有手瓜𦟌嘅朋友表示兩分鐘攪掂，真係唔講得笑)。

形狀 ⭐️⭐️⭐️⭐️
細心一睇原來八支充氣管嘅最外側兩支係特別高，造成一個窩狀瞓上去自然更加穩陣。

試瞓一晚，由於有呢個厚度，仰睡側睡都冇問題，瞓咗一個好覺，個人認為係十分唔錯嘅地蓆。另外仲有雙人版，最適合同另一半去露營時用啦！

銷售地點：Funshop Outdoor 露營戶外用品店

售價：$720 / 會員價 $576

文｜涉水步行

👍香港 Gear4Wild 專頁