發佈者：

台灣 OUTTHERE 特大4人營 ‧ 可靠舒適至啱家庭！


買營呢家嘢，唔駛講梗係要買個營先啦，入手時要考慮嘅除咗季節、地點、可攜性、活動性質，其實舒適度都係好重嘅條件，尤其係幾個朋友、一家幾口去camp 輕鬆下嗰陣，營入面嘅空間大細同埋各項貼心返計都係影響舒適度嘅關鍵！

台灣得天獨厚嘅天然環境令露營活動風氣大盛，而隨著玩家們品味及要求日漸提高，台灣品牌嘅用料同埋設計亦唔輸蝕得過日本甚至歐美產品。OUTTHERE 就係台灣營帳品牌之中一個甚有代表性嘅牌子，最初認識佢時係一個眾籌開發項目，由一班不同專業領域但係同樣熱愛露營嘅人共同參與研發，生產休閒營帳以及周邊用品嘅一個品牌。

今次《裝備在野》為大家介紹 OUTTHERE 一隻專門為咗香港而設計嘅4人營，有去過 Camp 都知，香港露營最常見就係4人營，而且呢個大細嘅營帳就最合適本地家庭或是學校中心活動，市面上嘅選擇眾多，咁OUTTHERE LiteBase 4 有咩值得大家留意？


01｜寬敞空間，遠超一般四人營

唔知大家初出矛蘆時有冇試過，個Frd子話會帶個4人營出發，4個老友瞓入去之後嗰種親密嘅感覺真係__，其實一般四人營內帳尺寸係210 x 210 cm，即係每人個係可以佔52.5cm咁闊，以一般充氣地蓆闊50cm 計，只要全晚唔郁，雙手放喺胸前交疊係冇問題嘅，又或者好似個使用說明圖咁聞住個Frd隻腳瞓又會好啲。

但如果唔想生活得咁有挑戰性，可以試下趕一個人出營餵蚊，又或者選用 240 x 205 cm嘅 LiteBase 4，唔只人均闊度增加咗，樓底亦都由一般嘅120-130 cm 提高至 145cm，彎腰入營時都舒適咗唔少。


02｜通風透氣

曾經有台灣朋友講過「從來唔會喺2000米以下露營」，聽落係幾咁沙塵呢你話，原來因為2000米以下太濕佢頂唔順，而唔係借啲易鄙視低地玩法。所以專為香港悶熱潮濕天氣設計嘅
LiteBase 4，防水邊位以外採用全蚊紗式設計，熱到爆時都可以拆去外幕使用。


另外，外帳頂端有兩個比起一般營帳都為大嘅氣窗，假如春夏季時使，就可以加一把電風扇增加對流，熱空氣就可以送到營外啦！


03｜雙門設計 ‧ 內建遮陽天幕

雙門設計嘅好處除咗進一步增加對流，最明顯直接嘅當然係在於出入方便喇。一諗起用單門4人，瞓最入嗰位人兄成晚要柯夜尿，麻煩程度係可想而知。

LiteBase 4 兩門為不同設計，一面為兩扇全捲起或單邊捲起；另一邊係特大前門，可以配合行山杖撐起成為一個帳大好遮陰嘅空間，落大雨又好猛大陽又好都可以悠然自得 HEA 下。



04｜無懼風雨，全天侯應用

人在野外，當然要應付突如其來嘅天氣變化，如果你打算一年四季都露營，你需要嘅係一個防水系數高嘅營帳，LiteBase 4 採用75D Polyester 布料，防水系數達3000mm，喺耐水壓程度同重量上取得一個更好嘅平衡。


05｜鋁合金支架

有冇發現個舊營啲纖維桿開始一支支咁叉哂出嚟，又或者抽走纖維桿發現個營輕咗一半咁癲？其實而家嘅優質營帳都已經改用鋁合金營骨，LiteBase 4 當然都唔例外，相對纖維桿而言會比較輕巧、抗風力更強，而且更為耐用添！



備有湖水藍 及 紫色 供用家選擇

評測結果

LiteBase 4 係一個十分理想嘅休閒4人營，佢內建咗唔少貼心設計，亦冇為咗偷輕而犧牲品作為一個家庭營必要嘅可靠及舒適感。首先全紗、加外帳雙門全開、開單門、開天幕、全關，四種 Setting 已經可以對應四種不同天氣狀況；筆者尤其欣賞佢嘅內建小型天幕設計，除咗作為休息區，萬一落雨時都可以即時化身小型廚房，聽住雨聲煮食都有另一番興致！

想喺今個露營季「置業」嘅朋友不妨諗諗！


 產品資料

帳幕尺寸(約)：長(205+70)x寬240x高145cm
收納後尺寸(約)：長45x寬18x高18cm
外帳質料：75D Polyester
內帳質料：黑色透氣網
帳底質料：150D防水牛津布
重量(約)：3.5kg (連配件)
配件： 2.5mm 實心營繩4條 , 鋁合金營釘11支
耐水壓：外帳2000mm，底帳3000mm
顏色：湖水藍  / 紫色

售價：$1080 / 會員價：$972

1. 旺角西洋菜南街5號好望角大廈17樓1703室 
2. 荃灣南豐中心6樓636室

*由即日起至2017年11月24日，回答簡單問題即有機會得到由 Funshop 送出 Outthere Litebase 4 (湖水藍  或 紫色)，得獎者共兩名，快啲參加！今個露季帶住新營去 Camping！

 Outthere 送大禮參加方法︰

 --- 請到 Facebook 專頁 Post 了解 ---
活動日期：2017年11月20 - 24日

文｜涉水步行

👍香港 Gear4Wild 專頁

留言

發佈留言

熱門文章