NEMO、EXPED 3 款充氣地蓆 ‧ 邊張至啱你心水？

想露營瞓覺瞓得好，除咗有一個上次介紹嘅靚睡袋之外，當然仲要有張好用嘅地蓆啦，唔只可以隔絕地面溫度瞓得暖啲，平整高低不平嘅地面，而更重要嘅係為腰骨提供支撐，講緊嘅係健康呀 ~ 你話幾重要先？

要稱得上好地蓆，要夠厚之餘，當然輕身、收納細小都好重要，而家愈來愈多人投入充氣地蓆陣營，論離地厚度同埋摺起夠細都係各種地蓆之冠，而且講明係「充氣」，充氣當然係重要嘅一環。如果可以做到用口吹但係冇口水同濕氣，咁靠個口去吹都冇問題，不過自問應該做唔到，如果唔想帶泵仲可以點？睇埋下面你就知！

以下呢幾款喺 Reecho 都搵到，3款充氣地蓆各有不同，又睇下邊張啱自己啦！

-5°C 禦寒 Exped SIM UL M
相比一般乳膠或者自動充氣地蓆，手動泵氣地蓆喺禦寒能力方面有好大優勢，好似呢張Exped SIM UL M咁，負5度嘅舒適溫度就算去到外地亦都大派用場，喺香港最凍嘅日子一樣冇問題！鐘意極地玩法定係純粹怕凍都啱哂你用。

今次測試使用 Exped Pillow Pump 進行充氣 (須另外購買)

另外有一點可能大家未必留意到，地蓆如果只得一個出入氣口，萬一不正確使用有機會因放氣過速而損壞氣筏接口攪到漏氣，大好一張地蓆就咁玩完，所以 Exped SIM UL M分別有單向入氣及專用出氣口，令地蓆更耐用。

設有單向入氣及專用出氣口

備有緊急維修包，萬一被刺穿漏氣亦可即時修補

Exped SIM UL M 充氣時間：
呢款地蓆冇跟氣泵，如果唔自備泵的話就要靠口吹了，今次測試就用 Exped Pillow Pump 去泵氣，呢款枕頭連氣泵設計真係一流，泵完氣仲可以用埋嚟瞓，絕對唔浪費背囊入面嘅每一寸空間。充氣時間約30秒攪掂。

Gear4Wild 評價：
面料舒適，瞓上去感覺平穩，附有維修包亦都更令人放心使用。

輕量之選 Exped AIRMAT UL LITE M
唔少人尋尋覓覓，就係為咗一張輕如無物嘅地蓆。真心講句「輕」並唔難，最難嘅係又輕又厚。Exped AIRMAT UL LITE M 只有350克重，採用超輕盈層壓薄的微纖維填充，可壓縮性特別強，容易收納至極細小體積 (22cm  高 x 7cm 直徑)；難得的是厚度達 5cm，瞓上去嗰種舒服令人諗起屋企張床褥。



另一樣充氣地蓆要留意嘅地方就係會唔會跣得滯，攪到成晚瀡滑梯或者側邊跣落床，AIRMAT UL LITE M用優質防滑層料，加上特有兩側氣管較高中間低嘅設計，瞓嘅時候被舒適包裹，自然瞓得安穩。

Exped AIRMAT UL LITE M 充氣時間：
AIRMAT UL LITE M 附送迷你手按泵一個，泵仔細細只重45克，相對泵氣時間就唔夠Pillow Pump快，完全充氣約一分鐘。

Gear4Wild 評價：
三張地蓆之中最輕亦都係最平，非常適合輕量化玩家使用。



內建手按充氣系統 NEMO VECTOR 20R
NEMO VECTOR 20R 最特別之處係，不假外求地蓆本身已經內置咗手泵，咁就唔怕唔記得帶泵啦！565克重量雖然唔係3張之中最輕，不過就係8cm嘅厚度同負9度就係三張之冠；收納後20(長) x 12 cm (直徑) 的尺寸亦相當輕巧。





NEMO VECTOR 20R 充氣時間：
用內置氣泵充氣當然係非常方便，不過花費時間相對較長，我地測試差不多要用兩分鐘，不過對於兩三日流流長嘅Camp嚟講都係好短時間嚟，唔好咁心急啦。

Gear4Wild 評價：
厚度、禦寒能力都係三張之中嘅 No. 1，難得嘅係重量仍然維持到喺600克之內，值得特別怕凍嘅朋友入手。



終極輕身枕頭 Exped Air Pillow UL
買得張舒服地蓆又點可以唔配個好嘅枕頭？除咗上面提過嘅 Exped Pillow Pump，仲有呢款只重45克嘅 Ultralight 枕頭 (Exped Air Pillow UL)，輕得嚟仲可以乎合人體工學設計，用家更可以充氣量調整高度/硬度，為自己嘅頸椎帶來最大舒適感，輕量化之餘仲咁舒服，絕對不作他選！



之前睇過睡袋，今次睇埋地蓆，再睇埋枕頭就堪稱瞓覺三寶齊哂！秋冬露營想瞓得舒服，其實唔難。

建議零售價
Nemo Vector 20R $1,450
Exped Air Mat UL Lite M with Pump $790
Exped Sim UL M$1,090
Exped Pillow Pump $299
Exped Air Pillow UL M$299

銷售地點：Re:echo 各門市

文｜涉水步行

👍香港 Gear4Wild 專頁

👍台灣  Gear4Wild 專頁